Bernhard Lippert: “Azərbaycan millisindəki işimi davam etdirməyə hazıram”

“Bizim üçün zəif rəqib yoxdu. Yeni komanda qurmağa çalışırıq. Buna görə də Maltayla oyun bizim üçün vacibdir. Üstəlik, səfərə bir neçə futbolçu olmadan yollanacağıq. Odur ki, Malta dişimizə görə rəqibdi”. Futbolxeber.az saytına verdiyi açıqlamada bu sözləri U-21 millisinin baş məşqçisi Bernhard Lippert deyib.

Əsas milli ilə yoxlama oyunundan sonra jurnalistlərin suallarını cavablandıran alman çalışdırıcı Azərbaycan yığmasındakı  fəaliyyətini davam etdirməyə hazır olduğunu qeyd edib: “Mən istefamı vermişəm. Hələ də öz fikrimdə qalıram. İlin sonunda AFFA bu barədə fikrini açıqlayacaq. Amma mən məşqçiyəm və bu sahədə çalışmaq mənə xoşdur. AFFA millidəki fəaliyyətimi davam etdirməyimi istəsə, bu barədə danışa bilərik”.