Stadion direktoru “Qarabağ” - “Dnepr” matçında baş vermiş bədbəxt hadisəyə görə azarkeşləri günahlandırdı

“Sıxlıq yaradıblar deyə, qapı təzyiqə dözməyib, çıxıb yerindən. Kim istəyərdi ki, o qapı insanların üzərinə düşsün?  Buna görə də stadiona bir az tez gəlmək lazımdır. Bu hadisə oyun başlayandan sonra olub”. Futbolxeber.az-ın məlumatına görə, Korner.az saytına verdiyi müsahibədə bu sözləri Tofiq Bəhramov adına Respublika stadionunun direktoru Akif İsmayılov deyib.

Qapının yerindən çıxması nəticəsində 1 azarkeş xəstəxanalıq olub, reanimasiyaya yerləşdirilsə də, İsmayılov buna görə heç kimin məsuliyyət daşımadığını bildirib: “Stadion rəhbərliyi heç bir məsuliyyət daşımır. Rəhbərliyin nə günahı var? Stadion hazırlanıb, klub yüksək səviyyədə yola salınıb. Azarkeşlər stadiona gəlməlidirlər, iğtişaş yaratmalı deyillər, hər şey normal olmalıdır. Rəhbərlik nə məsuliyyət daşımalıdır? Qapını itələyiblər, qapı sınıb, düşüb, buna görə məsuliyyət daşıyırlar? Qapını sıxmasan, sındırmasan qapı sınar? Mən indi azarkeşi də günahlandırmıram, o da insandır da. O qapı mənim də üstümə düşə bilər. Düz deyil? Başqa birisinin də üstünə düşə bilər.Yəqin ki, orda sıxlıq yaranıb, biz bütün stadionu gəzib, bütün yerlərə nəzarət edə bilmərik, axı. Hər şeyə nəzarət edən işçilər “Qarabağ”ın tabeliyində idi. Ya azarkeşlər oyuna gec gəliblər, ya orda kimsə darvazanı bağlayıb. Mən orda nə baş verdiyini dəqiq deyə bilmərəm”.