Tərlan Əhmədov: “Komandamı tanıya bilmədim”

“Belə oyunlardan sonra danışmaq çətindir. Futbolçulardan belə sönük oyun gözləmirdim”. Futbolxeber.az-ın məlumatına görə, bu sözləri “Neftçi” ilə oyundan sonra AZAL-ın baş məşqçisi Tərlan Əhmədov deyib.

Əhmədov komandasını tanıya bilmədiyini qeyd edib: “Ola bilər ki, ot örütüyü, oyunlar arasında fasilənin az olması nəticəyə təsir etsin. Bu gün komandamı tanıya bilmədim. Komandam bu gün heç nə edə bilmədi. Bəlkə də futbolçular “Simurq”la oyunun son dəqiqələrində buraxılan qolun şokundan hələ ayılmayıblar.  Bu oyun göstərdi ki, görüləsi işlər çoxdur. Bir komanda 3 ay ərzində formalaşmır. Yaxşı ki, fasilə var. Həmin fasilədən maksimum istifadə etməliyik. Məğlubiyyət üzücüdür. Bunun səbəblərini araşdıracağıq”.