Nildo: “Qarabağ”a hörmətlə yanaşıram, amma...” (Müsahibə)

“İnter”in hücumçusu Franka Nildo “Neftçi” ilə oyundan sonra Futbolxeber.az saytına müsahibə verib.

- Əvvəlcə “Neftçi”yə qarşı baş tutan oyun barədə fikirlərini açıqlayardın.

- Yaxşı oynadıq. “Neftçi” də yaxşı komandadır və bizimlə oyunda yaxşı müdafiə olundular. Səfərdə oynayırdıq, buna görə də nəticəni pis saymaq olmaz. Bir xal bizim üçün vacibdir.

- “İnter” son 2 oyunda qol vura bilməyib. Bunun səbəbi nədir?

- Dəqiq bir söz deyə bilmərəm. Bəzən alnır, bəzən yox. Biz hər oyunda qələbə qazanmağa, qol vurmağa çalışırıq. İnanıram ki, artıq növbəti oyunda bu problemi həll edəcəyik.

- Sona yaxın əvəzləndin. Güc qalmamışdı, yoxsa...?

- Yox, bu baş məşqçinin qərarı idi. Mən özümdə güc hiss edirdim. Baş məşqçi oyunu kənardan izləyir və lazım olanda dəyişiklik edir.

- Əvəzləmədən sonra Tsxadadze ilə aranızda kiçik dialoq oldu. Baş məşqçi nədən narazı idi?

- Bir epizodla bağlı fikrini bildirdi. Bunda qeyri-adi nəsə yoxdur. Ümumiyyətlə, baş məşqçimiz haqda ancaq xoş sözlər deyə bilərəm. Oyun zamanı bəzən əsəbləşir və iradlarını bildirir.

- Növbəti turda “İnter” “Qarabağ”la qarşılaşacaq. Ağdam klubundan yenidən zirvəni geri ala biləcəksiniz?

- “Qarabağ”a hörmətlə yanaşıram. Ancaq öz komandama da çox inanıram. Biz mütəmadi olaraq qələbə qazanmağın yollarını fikirləşirik. Hələ çempionatın ilk dövrəsi arxada qalıb. Qarşıda daha 3 dövrə var.