Sadıq Sadıqov: “O, futbol sahəsindəki bacarığı ilə bizə bu işdə kömək edəcək”

“Neftçi” PFK-nın prezidenti Sadıq Sadıqov kluba yeni vitse-prezidentin təyinatı ilə bağlı fikirlərini bildirib. Futbolxeber.az-ın məlumatına görə, Sadıqov klubun rəsmi saytına açıqlamasında Elnur Məmmədovun “Neftçi”yə fayda verəcəyinə inandığını qeyd edib: “Bir müddət idi ki, “Neftçi”də vitse-prezident vəzifəsi boş idi. Bu vəzifəyə gənc və bacarıqlı bir insanı dəvət etdik. Elnur Məmmədov futbol sahəsində fəaliyyət göstərmiş və idarəçilik qabiliyyəti olan gənc mütəxəssisdir. Onunla “Neftçi”nin “Bakcell Arena”da keçirilmiş oyunlarında da həmsöhbət olmuşuq və Elnur Məmmədovun futbol sahəsindəki fəaliyyətinə bələdik. “Neftçi” Azərbaycan futbolunun ən köklü klubudur. Bu komanda hər zaman ən yüksək yerlər və ən ali mükafatlar uğrunda mübarizə aparır. Məqsədimiz bu uğurların davamını gətirmək və daha böyük nailiyyətlərə imza atmaqdır. İnanıram ki, Elnur Məmmədov futbol sahəsindəki bacarığı ilə bizə bu işdə kömək edəcək. Ona gələcək işlərində uğurlar arzulayırıq və əminik ki, onun təyinatı klubumuz üçün faydalı olacaq”.