Arif Əsədov: “İlk il üçün rəhbərlik qarşıma çempionluq məqsədi qoymayıb”

“Mənim qarşıma konkret olaraq bu il üçün çempionluq məqsədi qoyulmayıb”. Futbolxeber.az saytına verdiyi müsahibədə bu sözləri “Neftçi”nin baş məşqçisi Arif Əsədov deyib.

Əsədov əsas məqsədinin daha güclü “Neftçi” formalaşdırmaq olduğunu bildirib: “Rəhbərlik mənə 1 il vaxt verib ki, komandaya əl gəzdirim, daha güclü heyət formalaşdırım. Ondan sonra isə çempionluq uğrunda mübarizə aparaq. Ötən illə müqayisədə legioner limitində də dəyişiklik var. Ötən il meydana 8 legioner çıxa bilərdi. Amma indi rəqəm 6-ya bərabərdir. Bu səbəbdən də məqsədimiz əsasən yerli futbolçuları inkişaf etdirmək, yeni istedadları tapıb üzə çıxarmaqdı. Yaxşı ki, Elnur Allahverdiyev azad agent statusu ilə bizə qoşuldu. Onun gəlişi yerinə düşdü. Məqsədimiz “Neftçi”ni daha yüksəltmək, eləcə də milli üçün daha çox futbolçu yetişdirməkdi. Amma elə anlaşılmasın ki, bu mövsüm bizim üçün əhəmiyyət kəsb etmir. Əsla. Biz çalışırıq ki, gənclər qələbə psixologiyası ilə formalaşsınlar. Bunun üçün də hər oyunda meydana yalnız qələbə üçün çıxırıq. Əvvəl də “Neftçi”də işləmişəm, bilirəm ki bu komandada qələbədən başqa hər hansı bir nəticəni düşünmək olmaz”.