Cavid Hüseynov: “Xəzər Lənkəran”la oyunda xal itirməyə haqqımız yoxdu”

“Cari mövsümə uğursuz başlamasına baxmayaraq, “Xəzər Lənkəran” çox güclü komandadır. Daim iddialılar sırasında olub”. Futbolxeber.az saytına verdiyi açıqlamada bu sözləri “Qəbələ”nin üzvü Cavid Hüseynov deyib.

Təcrübəli futbolçu Premyer Liqanın 7-ci turunda qarşılaşacaqları Lənkəran təmsilçisi haqda müsbət fikirlər səsləndirib: “Son turda “Xəzər Lənkəran” qələbə qazandı. Komandanın yaxşı heyəti var. İnanıram ki, onlar bu mövsümdə də sözlərini deyəcəklər. Hər zaman olduğu kimi yenə də iddialıların arasında olacaqlar”.  

Bununla belə, Cavid Hüseynov rəqibi mütləq məğlub etməli olduqlarını qeyd edib: “Rəqib güclü olsa da, biz evdə oynayırıq. Ötən tur “Neftçi” ilə matçda xal itirdik. Odur ki, “Xəzər Lənkəran”la oyunda xal itirməyə haqqımız yoxdur. Nə olur olsun, bu dəfə mütləq qələbə qazanmalıyıq”.