Karlos Kardoso: “Böyükağa Hacıyev “Neftçi”də tarix yazıb” (Müsahibə)

“Neftçi”nin müdafiəçisi Karlos Kardoso Futbolxeber.az saytına müsahibə verib.

- “Qəbələ”yə qarşı baş tutan oyunu necə şərh edərdin?

- Çox yaxşı nəticə oldu. “Qəbələ” güclü komandadır. Onlar da çempionluq uğrunda mübarizə aparırlar. Odur ki, səfərdə 1 xal qazanmağı uğur saymaq olar.  

- Hər halda, qələbə qazana bilmədiniz...

- Düzdür, qələbə qazanmadıq. Amma qapımızı toxunulmaz saxladıq. Komandam qol buraxmayıbsa, müdafiəçi kimi bunu yaxşı nəticə hesab edirəm.

- Səndən əvvəl danışdığım komanda yoldaşların  “bir xal qazanmadıq, 2 xal itirdik” dedilər. Sən də onlar kimi düşünürsən?

- Hər kəsin fikrinə hörmət etmək lazımdı. Məncə, çox yaxşı oyun göstərdik. Komandamızda məşqçi dəyişikliyi oldu. Hazırda da yüksəlişdəyik. Son 2 oyunda yaxşı nəticə qazandıq. Belə də davam etsək, istədiyimizə nail olacağıq.

- Böyükağa Hacıyevin gedişi, Arif Əsədovun gəlişi “Neftçi”də nəyi dəyişdi?

- Böyükağa Hacıyev “Neftçi”də tarix yazıb. Ona çox böyük hörmətimiz var. O ki qaldı indiki məqama, hazırda “Neftçi” fiziki cəhətdən daha güclüdür.  

- Qarşıdan “Qarabağ”la oyun gəlir...

- Çox çətin və vacib oyun olacaq. İlk növbədə həftə ərzində bu oyuna ciddi şəkildə hazırlaşmalıyıq. Daha sonra isə yaxşı oyun sərgiləyib, uğur qazanmalıyıq.

- “Qarabağ”ın lideri həmyerlin Reynaldodur. Onun qarşısını almaq üçün xüsusi planın var?

- Mən Reynaldoya yox, “Qarabağ”a qarşı hazırlaşıram.