Elvin Yunuszadə: “Məqsədimiz “Qarabağ”ı məğlub etməkdi”

“Bizi çətin oyun gözlədiyini əvvəldən də bilirdik. Odur ki, “Qəbələ” ilə oyuna çox ciddi hazırlaşmışdıq”. Futbolxeber.az saytına verdiyi açıqlamada bu sözləri “Neftçi”nin müdafiəçisi Elvin Yunuszadə deyib.

“Qəbələ”yə qarşı keçirilən oyun (0:0) haqda danışan Yunuszadə, rəqibi təbrik etməyi unutmayıb: “Qəbələ səfəri hər bir komanda üçün çətin olur. Buradakı havaya uyğunlaşmaq asan deyil. Oyuna gəldikdə isə pis oynamadıq. Yaxşı imkanlarımız olsa da, yararlana bilmədik. Həmin şanslardan istifadə etsəydik, matçın nəticəsi tam fərqli olacaqdı. “Qəbələ” də pis oynamadı. Odur ki, onları da təbrik edirəm”.   

“Neftçi”nin üzvü növbəti turda qarşılaşacaqları “Qarabağ”la oyun haqda da fikirlərini açıqlayıb: “Artıq “Qarabağ”nan oyunu düşünməliyik. Həmin matç bizim üçün böyük əhəmiyyət kəsb edir. Məqsədimiz də qələbə qazanmaqdır”.