Şehiç: “Bu cür oyundan sonra 1/16 finala çıxmaq arzusu yaranır”

“Cəmi 1 xal qazandıq. Amma 3 xala layiq idik. Bəlkə də bəxtimiz gətirmədi”. Futbolxeber.az-ın UEFA-nın rəsmi saytına istinadən verdiyi məlumata görə, bu sözləri “Sent Etyen”lə oyundan sonra “Qarabağ”ın qapıçısı İbrahim Şehiç deyib.

O, irəliyə qaçmaq istəmədiyini qeyd edib: “İstənilən halda bu nəticəyə sevinməliyik. Çünki bu, qrup mərhələsindəki ilk oyunumuz idi. Rəqibimiz də zəif komanda deyildi. Təbii ki, bu cür oyundan sonra 1/16 finala çıxmaq arzusu yaranır. Amma irəliyə qaçmaq istəməzdim”.

Şehiç azarkeşlər haqda da fikirlərini açıqlayıb: “Azarkeşləri çox bəyəndim. Onlar stadionu dolduraraq, bizi sona kimi dəstəklədilər. Bu insanlar daha artığına layiqdirlər. Ümid edirəm ki, onlar nəticədən razı qaldılar”.

“Qarabağ”ın qolkiperi öz çıxışı barədə bunları deyib: “İkinci hissədə elə də çox işim olmadı. Amma ilk yarıda bir neçə dəfə oyuna qoşulmalı oldum. Yaxşı oynadıq. Yalnız qol vura bilmədiyimizə təəssüflənirəm”.