UEFA açıqladı: “Qarabağ” Avropada 65-ci, “Neftçi” 99-cudu

UEFA cari mövsümdə avrokuboklarda çıxış edən klubların reytinq cədvəlini açıqlayıb. Futbolxeber.az-ın Eurocups.ru-ya istinadən verdiyi məlumata görə, cədvəl tərtib olunarkən klubların cari mövsümdə avrokuboklarda göstərdikləri nəticələr əsas götürülüb.

239 kollektivin adının yer aldığı siyahıda Azərbaycanı cari mövsümdə qitə kuboklarında təmsil edən 4 klubun da adı var. Ən yaxşı göstərici gözlənildiyi kimi, “Qarabağ”a məxsusdur. Ağdam klubu hazırda 65-ci pilləni tutur. “Qarabağ” cari mövsümdə reytinqini 2,4750 bal artırıb. Bu nəticə ilə “Qarabağ” “Seltik”, “Dinamo” (Kiyev), PSV, “Lokomotiv” (Moskva), “Real Soseydad”, “Tvente” kimi klubları qabaqlayıb. Avroliqanın play-off mərhələsində mübarizəni dayandıran “Neftçi” 99-cu yeri tutur. “Ağ-qaralar” reytinqini cari mövsüm 1,9750 əmsal artırıb.

İkinci mərhələdə mübarizəni dayandıran “İnter” sıralamada 168-ci, elə ilk turda “Şiroki Briyeq” qarşısında aciz qalan “Qəbələ” isə 196-cı yeri tutur.