Rəşad Sadiqov: “Qələbə qazansaydıq, belə söhbətlər olmayacaqdı” (Müsahibə)

“Xəzər Lənkəran”ın futbolçusu Rəşad Sadiqov “Neftçi” ilə oyundan sonra Futbolxeber.az saytına müsahibə verib.

- Oyun haqda nə deyə bilərsən?

- Gərgin oyun alındı. “Xəzər Lənkəran”la “Neftçi” arasındakı oyunlar həmişə belə keçir. Matçın əvvəlində hesabda geri düşdük. Lakin sonradan əla fürsət qazandıq. Həm penalti vururduq, həm də rəqib azlıqda qaldı. Amma penaltidənm yararlana bilmədik. Halbuki həmin epizodda qol olsaydı, matçın nəticəsi tam fərqli olacaqdı. İkinci hissədə də hücumlarımızı davam etdirdik. 5-6 qol epizodumuz da oldu. Amma onlardan yararlana bilmədik.

- Penaltinin qaçırılması komandaya psixoloji cəhətdən təsir etdi?

- Əlbəttə, bu məqamın böyük təsiri oldu. Həmin anda hesabı bərabərləşdirsəydik, ikinci yarıda tam fərqli oyun gedəcəkdi. Təəssüf ki, o cür şansdan yararlana bilmədik.

- Penaltini niyə məhz Qalin İvanov yerinə yetirdi?

- Bu, baş məşqçinin qərarı idi.

- Yəni, əvvəldən belə bir qərar qəbul edilmişdi?

- Bəli. Deyilmişdi ki, penalti olsa, o yerinə yetirəcək.

- “Xəzər Lənkəran”ın heyətində ilk dəfə olaraq “Neftçi”yə qarşı oynadın. Hansı hisslər keçirirdin?

- Qeyri-adi heç nə hiss eləmirdim. Mənim üçün rəqibin kimliyi önəm daşımır. Hər oyunda komandamın uğurunda pay sahibi olmaq istəyirəm.

- Amma azarkeşlər demək olar ki, topa hər toxunuşunu uğultuyla qarşılayırdılar...

- Buna da normal yanaşıram. Azarkeşlərə fikir vermirdim. Onların rəqib futbolçunu fitə basması normal haldı.

- “Xəzər Lənkəran”ın heyətində ikinci hücumçunun olmaması öz sözünü dedi. Əgər, Oğuz Çətin ikinci yarıda meydana başqa bir hücumçu buraxsaydı, komandanın qol vurmaq şansı bəlkə də daha çox olardı. Bu fikirlə razısan?

- Bu sualı mənə yox, baş məşqçiyə versəniz daha yaxşı olar. Həm də kənardan daha yaxşı görsənir. Mənim nəsə deməyim düz çıxmaz. Bəlkə də bu söhbətlər məğlubiyyətdən irəli gəlir. Qələbə qazansaydıq, belə söhbətlər olmayacaqdı.

- 5 turdan sonra “Xəzər Lənkəran”ın aktivində cəmi 4 xal var. Razısan ki, çempionluğa oynayan komanda üçün bu, çox pis nəticədir?

- Əlbəttə, razıyam. Belə vəziyyətə düşdüyümüz üçün özümüz də təəssüflənirik. Amma toparlanmaq lazımdı. Mütləq növbəti oyunlarda bu vəziyyəti düzəltməliyik. Əslində, indi aktivimizdə 4 yox, 10 xal olmalıydı. Lakin əvvəlki oyunlarda heç nədən xal itirdik. Şansızlıq yaşadıq. İnanıram ki, tezliklə bu vəziyyətdən çıxacağıq.