Berti Foqts: “70-ci dəqiqədən sonra komandada güc qalmadı”

“2 kobud səhvə yol verdik. Rəqib də bundan faydalanaraq, 2 qol vurdu. Qapımızda ilk qolu gördükdən sonra komandam çətinlik çəkirdi. Amma zaman keçdikcə vəziyyət dəyişdi. Qol da vurduq. 70 dəqiqə rəqiblə bərabər oynadıq. Amma ondan sonra güc qalmadı”. Futbolxeber.az-ın məlumatına görə, bu sözləri Bolqarıstanla oyundan sonra milli komandamızın baş məşqçisi Berti Foqts deyib.

Alman mütəxəssis müdafiə xəttindən gileylənib: “Müdafiədə çətinliklərimiz var idi. Gənclər meydana çıxmışdı. Bilirdim ki, onların da təcrübəsi yoxdu. Amma daha inamlı təsir bağışlacaqlarına ümid edirdim”.  

Foqts qeyd edib ki, o, futbolçuların fiziki durumunu yaxşılaşdıra bilməz: “10 gün ərzində futbolçuların fiziki vəziyyətini düzəldə bilmərəm. Ölkə çempionatında komandalar 3 gündən bir oynaya bilmirlər”.

Foqts növbəti oyunlarda uğurlu nəticəyə inandığını qeyd edib: “İşimiz çətinləşdi. Ümid edirdim ki, qələbə qazanacağıq. Ən pis halda 1 xal qazanacağımıza inanırdım. Lakin alınmadı. Bu, ilk oyun idi. İndi səhvlərimiz üzərində işləyib, növbəti matçlara hazırlaşmalıyıq”.