Avrokuboklarda Bakıda debüt edən referi Azərbaycan - İsraiı oyununda

21 yaşadək futbolçulardan ibarət komandalar arasında Avropa çempionatının seçmə mərhələsi çərçivəsində sentyabrın 3-də, keçiriləcək Azərbaycan - İsrail matçının baş hakimi müəyyənləşib. Futbolxeber.az-ın məlumatına görə, görüşü latviyalı Andris Treimanis idarə edəcək.

Yaşının az olmasına (29) baxmayaraq, Treimanis artıq 3 ildən artıqdır ki FİFA referisidir. O, buna kimi 2 dəfə Azərbaycan millisinin oyunlarını idarə edib. Söhbət U-17 yığmasından gedir. 2011-ci ildə Avropa çempionatının seçmə mərhələsində Treimanisin idarə etdiyi ilk oyunda millimiz Xorvatiyanı 2:1 hesabı ilə məğlub edib. Həmin matçda latviyalı hakim 2 futbolçumuzu sarı vərəqəylə cəzalandırıb. Treimanisin idarə etdiyi ikinci matçda isə millimiz Ukraynayla qolsuz bərabərə qalıb. Bu dəfə latviyalının qəzəbinə 1 futbolçumuz tuş gəlib. Həmin vaxt U-17-nin heyətində çıxış edənlərdən yalnız Namiq Ələsgərov İsraillə oyuna dəvət alıb.

Treimanis buna kimi 1 dəfə Bakıya gəlib. O, 2011-ci ilin yayında Avroliqanın I təsnifat mərhələsi çərçivəsində baş tutan AZAL - “Minsk” (1:1) görüşünün baş hakimi olub. Bu, Treimanisin karyerasında avrokuboklarda idarə etdiyi ilk oyun idi.