Tahir Süleymanov: “Neftçi” birmənalı şəkildə qrup mərhələsinə düşməlidi”

“Oyunla bağlı nə deyim? Elə mətbuatın da yazdığı kimi, “Neftçi” 4 qol vurub. 2:3 uduzdu. Mən hesab etmirəm ki, “Partizan” bizə qalib gəldi. “Neftçi” özü-özünə məğlub oldu. Eyni hal Bakıda “Koper”lə oyunda da yaşanmışdı”. Futbolxeber.az saytına verdiyi açıqlamada bu sözləri “Neftçi”nin vitse-prezidenti Tahir Süleymanov deyib.

Klub rəsmisi Bolqarıstan çempionu “Ludoqorets”in taleyini yaşadıqlarını bildirib: “Partizan çox güclü komandadı. Amma “Neftçi”nin də gücü hər kəsə bəllidi. Elə oyunsonrası mətbuat konfransında da rəqib baş məşqçi “Neftçi”nin gücünü qabartdı. Oyunun ilk 15-20 dəqiqəsində vurulan 2 qol sanki komandanı arxayınlaşdırdı. Bundan öncə futbolçulara dəfələrlə bildirmişdik ki, Bolqarıstan çempionu “Ludoqorets” Belqradda oyunun əvvəlində 2 qol vursa da, elə ilk yarıda qapısında 2 qol görüb. “Partizan”a göz açmağa imkan vermək olmaz. Amma təəssüflər olsun ki, eyni səhvi biz də təkrarladıq. Ardıcıl iki qolan sonra komanda arxayınlaşmamalı, əksinə “Partizan” ayılmamış üçüncü, dördüncü qolu vurmaqlı idi”.

“Cavab oyunu üçün şansları necə dəyərləndirirsiz” sualını Süleymanov belə cavablandırıb: “Birmənalı şəkildə “Neftçi” qrup mərhələsinə düşməlidi, birmənalı şəkildə. Fürsətdən istifadə edib, sizin vasitənizlə bütün “Neftçi”, Azərbaycan futbolunun azarkeşlərinə səslənirəm. Hər kəsi stadiona dəvət edirəm. Azərbaycan futbolunda ilk olaraq Kiprdə tarix yazan “Neftçi” bu dəfə eyni uğuru doğma meydanında təkrarlamalıdır. Bunun üçün çox gözəl fürsət var. Rəqib güclü olsa da, “Neftçi” bu dəfə öz meydanında oynayır. Komanda cavab görüşündə daha aqressiv, bir qədər ehtiyatlı oynamalı, top buraxmadan qələbə qazanmaqla ikinci tarixi yazmalıdır. “Partizan”ın bizi məğlub etməsində azarkeşlərin böyük rolu oldu. Komanda qapısında ardıcıl 2 qol görsə də, onlar bir dəqiqə susmur, “Partizan”ı irəli səsləyirdilər. İnanıram ki, eyni dəstək “Neftçi”yə də göstəriləcək. Komandamızın xəyalından qələbədən başqa heç nə keçə bilməz. Çempionlar Liqasında mübarizəyə başlayıb, Avroliqanın qrupuna düşmək öz yerində. Amma bu dəfə biz elə Avroliqadan başlayıb, qrupa düşmək istəyirik ki, bu da yeni tarix olacaq”.