“Neftçi” “Partizan”la oyuna görə UEFA-ya müraciət etdi

“Neftçi” UEFA-ya müraciət edib. Futbolxeber.az-ın məlumatına görə, “ağ-qaralar” Avroliqanın play-off mərhələsinin cavab oyunu çərçivəsində “Partizan”a qarşı keçiriləcək görüşün Tofiq Bəhramov adına Respublika stadionunda deyil, “Bakcell Arena”da keçirilməsini istəyir. Bu haqda “Neftçi”nin İnformasiya və İctimaiyyətlə Əlaqələr Departamentinin rəbhəri Gündüz Abbaszadə məlumat verib: “Neftçi” - “Partizan” oyununa bilet satışı bizdən asılı olmayan səbəblərə görə müvəqqəti olaraq dayandırılıb. Tofiq Bəhramov adına Respublika stadionunun heç də yaxşı vəziyyətdə olmayan ot örtüyü "Qarabağ" - "Tvente" oyunundan sonra daha bərbad hala düşüb. Bu səbəbdən “Partizan”la qarşılaşmanın Respublika stadionunda deyil, “Bakcell Arena”da keçirilməsi üçün UEFA-ya müraciət ünvanlamışıq. Müsbət cavab alacağımıza ümid edirik. Daha öncədən bilet almış azarkeşlərə nə etməli olduqları haqda məlumat UEFA-nın cavabından sonra veriləcək”.