"Partizan"ın baş məşqçisi: "Neftçi" ilə oyunların əhəmiyyəti qalmayacaq"

“Bəli, komandada problemlər var. Ancaq biz çıxış yolu tapmalıyıq. Qarşıda bizi vacib oyunlar gözləyir və bu matçlarda qələbə qazanmalıyıq". Futbolxeber.az-ın Qol.Az-a istinadən verdiyi məlumata görə, bu sözləri "Partizan" klubunun baş məşqçisi Marko Nikoliç Serbiya mətbuatına açıqlamasında deyib.

Təcrübəli mütəxəssis komandada yaranan problemlərin aradan qaldırılmayacağı təqdirdə Avropa Liqasının pley-off mərhələsində qarşılaşacaqları "Neftçi" ilə görüşün onlar üçün əhəmiyyətsiz olacağını bildirib: "Komandada çox pis atmosfer yaranıb. Futbolçular maaşlarını ala bilmədikləri üçün məşqlərə çıxmırlar və onların etirazları davam edir. Bəzi futbolçular komandanı tərk etmək istəyirlər. Artıq Miladin Stepanoviçin komandadan ayrıldığını yazırlar. Bu barədə mətbuatdan oxuyuruq. O, çox təcrübəli futbolçudur, məşqlərini davam etdirməli və komandanın yanında olmalıdır. Bizim ağ bayraq qaldırmaq fikrimiz yoxdur. Komandamla fəxr edirəm. Biz heç bir futbolçunun komandadan getməsinə imkan verməməliyik. Ancaq klubun da bizim qarşımızda öhdəlikləri var və onlar bunu yerinə yetirməlidirlər. Əks təqdirdə "Neftçi" ilə oyunların heç bir əhəmiyyəti qalmayacaq".

Qeyd edək ki, "Partizan" klubu avqustun 21-də Avropa Liqasının pley-off mərhələsinin ilk oyunu çərçivəsində evdə "Neftçi"ni qəbul edəcək. Bu komandalar arasında cavab qarşılaşması isə avqustun 28-də, Bakıda keçiriləcək.