UEFA “Real” - “Yuventus” matçının hakimini “Qarabağ”ın oyununa təyin etdi

Xəbər verdiyimiz kimi, Avroliqanın play-off mərhələsinin ilk oyunu çərçivəsində baş tutacaq “Qarabağ” - “Tvente” matçını alman Manuel Grafe idarə edəcək. Futbolxeber.az-ın məlumatına görə, 41 yaşlı referi 2007-ci ildən FİFA hakimi adını daşıyır. Bu günə kimi onun yolu nə millimiz, nə də klublarımızla kəsişib. Avropada kifayət qədər tanınan Grafe 2 dəfə Hollandiyanın əsas, 1 dəfə isə U-21 millisinin oyununu idarə edib və hər 3 halda hollandlar meydandan qalib ayrılıblar.

Avrokuboklarda isə alman referi 3 dəfə Hollandiya klublarının oyununda ədaləti qoruyub. Onun idarə etdiyi oyunlarda - 2011/12 mövsümündə Avroliqada “Ayaks” və PSV uyğun olaraq “Spartak” və “Valensiya”ya uduzub. Əvəzində ÇL-də “Ayaks” Zaqreb “Dinamo”sunu səfərdə məğlub edib. Göründüyü kimi, Grafenin idarə etdiyi Avroliqa oyunlarında Hollandiya təmsilçiləri meydanı məğlub qismində tərk ediblər.

Karyerası ərzində bir çox mühüm oyunlara təyinat alan Manuel Grafe ötən il ÇL-in qrup mərhələsi çərçivəsində baş tutan “Real” - “Yuventus” matçını (2:1) idarə edib.