Azərbaycan klublarından avrokuboklarda görünməmiş nəticə

Azərbaycan klubları avrokuboklarda rekorda imza atıblar. Futbolxeber.az-ın araşdırmasına görə, təmsilçilərimiz ilk dəfə olaraq 1 mövsüm ərzində 5 dəfə səfər oyununda meydanı qalib qismində tərk ediblər. Bu qələbələrdən 2-si “İnter”in, 2-si “Neftçi”nin, 1-i də “Qarabağ”ın aktivindədir. “Bankirlər” Moldova “Tiraspol”u 3:2, İsveçdə “Elfsborq”u 1:0, “Neftçi” Sloveniyada “Koper”i 2:0, Gürcüstanda “Çixura”nı 3:2, Ağdam klubu isə Maltada “Valletta”nı 1:0 hesabı ilə məğlub edib.  

Buna qədər rekord 2010/11 mövsümündə qeydə alınmışdı. Həmin vaxt təmsilçilərimiz 4 dəfə rəqib meydanında qələbəyə seviniblər. “Qarabağ” Şimali İrlandiyada “Portdaun”u (2:1), Polşada “Visla”nı (1:0), “İnter” Polşada “Lex”i (1:0), “Bakı” da Çernoqoriyada “Buduçnost”u (2:1) üstələyib.

Qeyd edək ki, “Neftçi” və “Qarabağ” Avroliqada çıxışını davam etdirdiyindən təmsilçilərimizin cari mövsümdəki nəticəni daha da yaxşılaşdırmaq ehtimalı var.