"Qarabağ"ın 19 potensial rəqibi müəyyənləşdi

Çempionlar Liqasında mübarizəni dayandıran "Qarabağ" klubunun Avroliqanın "pley-off" mərhələsindəki 19 potensial rəqibi müəyyənləşib. Futbolxeber.az-ın 

Qol.Az-a istinadən verdiyi məlumata görə, bu rəqiblərdən 7-si Çempionlar Liqasında mübarizəni dayandıran, 12-si isə "pley-off" mərhələsinə birbaşa qoşulanlardır.

 

"Qarabağ" püşk zamanı səpələnməmişlər səbətində yer alacaq ki, bu da Ağdam təmsilçisini nisbətən güclü rəqiblə üz-üzə qoyacaq. "Qarabağ"ın potensial rəqibləri sırasında "İnter" (İtaliya), "Tottenhem" (İngiltərə), "Vilyareal" (İspaniya), "Tvente" (Hollandiya), "Seltik" (Şotlandiya), "Makkabi" (Təl-Əviv, İsrail), "Sparta" (Praqa, Çexiya) və "Borussiya" (Münhenqladbax, Almaniya) kimi komandalar var. 

 

Ümumilikdə pley-off mərhələsində 62 komanda çıxış edəcək ki, bunlardan da 33-ü artıq müəyyənləşib. Qalan 29 iştirakçısının kimliyinə bu gün aydınlıq gələcək. Avropa Liqasının III təsnifat mərhələsinin qalibləri də pley-off mərhələsində iştirak hüququ əldə edəcəklər. Həmin komandalar sırasında Azərbaycanın "Neftçi" klubu da ola bilər. Lakin bunun üçün son ölkə kubokunun sahibi Gürcüstan "Çixura"sını mübarizədən kənarlaşdırmalıdır.

 

Qeyd edək ki, Avropa Liqasının pley-off mərhələsinin püşkü sabah, Bakı vaxtı ilə saat 16:00-da atılacaq.