“Çixura” - “Neftçi” matçında gürcülər üçün uğurlu hakim

Xəbər verdiyimiz kimi, Avroliqanın III təsnifat mərhələsinin cavab oyunu çərçivəsində baş tutacaq “Çixura” - “Neftçi” oyununu macarıstanlı Tamaş Boqnar idarə edəcək. Futbolxeber.az-ın məlumatına görə, macar referi 1978-ci ildə anadan olub. 2009-cu ildən FİFA hakimi statusunu daşıyır. Hazırda FİFA-nın ikinci kateqoriyalı hakimləri sırasına daxildir. Bu günə kimi Boqnar nə klublarımızın, nə də millimizin oyununu idarə edib.

Əvəzində o, 2 dəfə Gürcüstan klublarının avrkuboklardakı oyununda baş hakim olub. Boqnarın Avrokuboklardakı debütu “Lisburn Distillery” (Şimali İrlandiya) - “Zestafoni” (Gürcüstan) oyununa təsadüf edib. 2009-2010 mövsümündə keçirilən həmin matç gürcülərin 5:1 hesablı qələbəsi ilə yekunlaşıb.

Ötən mövsüm isə Boqnar Avroliqanın üçüncü təsnifat mərhələsi çərçivəsində baş tutan “Dila” (Gürcüstan) - “Hayduk” (Xorvatiya) matçını idarə edib. Avqustun 8-də keçirilən həmin qarşılaşmada da sevinən tərəf Gürcüstan təmsilçisi olub - 1:0.