Flavinyo: “Əsas odur ki qol buraxmayaq”

“Sabah yaxşı oynayacağımızı gözləyirəm. Bu oyun “Neftçi” yox, Azərbaycan azarkeşləri üçün vacibdir. Bir komanda qrupa düşürsə, bu, Azərbaycan futbolunun inkişafıdır. Sabah bizi çox məsuliyyətli oyun gözləyir. 1 dəfə qrupa düşsək də, keçən il uğursuz oynadıq. Komandamız indi daha güclüdür. Sabah yaxşı oynayıb, qələbə qazanacağımıza inanıram”. Futbolxeber.az-ın məlumatına görə, bu sözləri “Neftçi”nin üzvü Flavinyo deyib. “Koper”lə oyunöncəsi mətbuat konfransında iştirak edən braziliyalı futbolçu Sloveniya təmsilçisinin fiziki cəhətdən güclü olduğunu qeyd edib: “Məncə, “Koper” fiziki cəhətdən daha güclüdür. Onların ucaboy futbolçuları var. Bu səbəbdən də standart vəziyyətlərdə yaxşı oynayırlar. 14 nömrəli yarımmüdafiəçini qeyd edərdim. Yaxşı ötrmələr verir. Mənim üçün fərq odur ki, daha yaxşı oynamalıyıq. Əsas odur ki sabah qol buraxmayaq. Çalışıb, təzyiq edib bundan yararlanmalıyıq”.

Flavinyo “Neftçi”nin tək ondan ibarət olmadığını bildirib: “Mənim üçün bütün oyunlar eynidir. Daim məsuliyyətlə oynayıram. Bizim yaxşı futbolçularımız çoxdur. Tək məni saxlamaqla iş bitmir. Mən onsuz da əlimdən gələni edəcəyəm”.