“Tiraspol”un çalışdırıcısı: “Kim şansından yararlanırsa, o da qələbə qazanır”

“Ümumi götürdükdə, oyun bərabər keçdi. Rəqib bizim səhvlərdən yararlandı. Biz isə 0:3-ə kimi öz imkanlarımızdan yararlana bilmirdik. Rəqibi qələbə münasibəti ilə təbrik edirik. Onlar yaxşı oynayaraq, 3 qol vurdular. Təbii ki, kim şansından yararlanırsa, o da qələbə qazanır”. Futbolxeber.az-ın məlumatına görə, bu sözləri “İnter”lə oyundan sonra “Tiraspol”un baş məşqçisi Vlad Qoyan deyib.

“Tiraspol”un çalışdırıcısı müdafiədəki səhvlərdən gileylənib: “70-ci dəqiqəyə kimi oyunumuzun alınmadığını deyə bilmərəm. Həmin müddətdə 2-3 yaxşı şansımız var idi. Hələ ilk buraxılan qola qədər Ademar fərqlənə bilərdi. Amma biz vurmadıq, rəqib isə penalti qazandı. İkinci qol bizim künc zərbəsindən sonra vuruldu. Həmin ana kimi biz qol vursaydıq, nəticə fərqli olardı”.

Qoyan rəqibdən heç kimi fərqləndirmək istəməyib: “Rəqibdən kiminsə adını çəkə bilmərəm. Deyərdim ki, “İnter” yaxşı komandadır. Əlbəttə ki, cavab oyunu öncəsi rəqib daha şanslıdır. Lakin itiriləsi heç nəyimiz yoxdur. Biz futbol oynamalı və qol vurmağa çalışmalıyıq”.