"İnter"in direktoru futbolçularla görüşdü

Tofiq Mustafayevin rəhbərlik etdiyi “İnter”in ehtiyat heyəti çempionatın 27-ci turu çərçivəsində keçiriləcək “Simurq”la oyuna hazırlaşır. Futbolxeber.az-ın məlumatına görə, ötən tur əvəzedici komanda “Qarabağ” üzərində 5:0 hesablı qələbə ilə fərqlənmişdi. “İnter” komandasının direktoru Natiq Məmmədov ikinci komandanın rəhbərliyi və futbolçularıyla görüşdü. N.Məmmədov kollektivi parlaq qələbə münasibətilə təbrik etdi, qarşıdakı oyunlarda uğurlar arzuladı və ehtiyat komandanın klub üçün əhəmiyyətindən danışdı.

 

Əvəzedici komandanın baş məşqçisi Tofiq Mustafayev xoş sözlərə görə komandanın direktoruna minnətdarlığını bildirdi və əlavə etdi ki, rəhbərlik etdiyi komanda ona olan ümidləri doğrultmaq niyyətindədir.

 

Qeyd edək ki, əvəzedici heyətlər arasında keçirilən Azərbaycan Çempionatında 27-ci turun oyunu sabah “Şəfa” stadionunda baş tutacaq. Oyun saat 16.00-da keçiriləcək.