“Qəbələ”nin məşqçiləri “Yuventus”un düşərgəsində

Hazırda Stefano Qusella turnirində iştirak məqsədilə İtaliyanın Turin şəhərində səfərdə olan "Qəbələ"nin U-15 komandasının məşqçilər heyəti "Yuventus" Futbol Akademiyasını  ziyarət edib. Futbolxeber.az-ın klubun rəsmi saytına istinadən verdiyi məlumata görə, akademiyanin direktor müavini Cüzeppe Geriyanın müşayiəti ilə akademiya binası və ofisləri ile tanış olan nümayəndə heyəti U-19, U-16 U-15 komandalarının meydançada, U-17 komandasının isə fitness zalında məşqlərini izləyib. Yekunda iki akademiya məşqçiləri arasında görüş keçirilib. Geriya, U-19 komandasının məşqçisi, sabiq futbolçu, dünya çempionu Fabio Qrosso və "Yuventus"un digər məşqçilərinin iştirakı ilə baş tutan görüşdə "Yuventus" Futbol Akademiyası haqqında suallar cavablandırılıb. "Yuventus" rəsmiləri bugün start götürəcək Stefano Qusella xatirə turnirində "Qəbələ"nin oyununu izləyəcəklərini bildiriblər.  

Qeyd edək ki, “Qəbələ”nin nümayəndə heyəti sabah İtaliya çempionatının XXXIV turu çərçivəsində baş tutacaq "Yuventus" - "Balonya" matçını izləyəcək.