“Bakı” - “Xəzər Lənkəran” oyunu niyə televiziya vasitəsiylə canlı yayımlanmayacaq?

Sabah Azərbaycan Premyer Liqasında 30-cu turun oyunları keçiriləcək. Futbolxeber.az-ın məlumatına görə, ən çox maraq doğuran oyunlardan biri “Bakı” - “Xəzər Lənkəran” matçıdır. Amma nədənsə bu oyun nə “İdman Azərbaycan” kanalı, nə də AzTV tərəfindən canlı olaraq yayımlanacaq. Halbuki “Bakı”nın demək olar ki, hər ev və kubok oyunu canlı olaraq televiziya vasitəsiylə azarkeşlərə təqdim olunur. Görəsən, bu dəfə nə baş verib ki, azarkeşlər “Bakı” - “Xəzər Lənkəran” matçına canlı olaraq baxmaq şansından məhrum olublar?

Məsələyə aydınlıq gətirmək üçün ilk öncə “Bakı”nın mətbuat xidmətinin rəhbəri İsgəndər İsgəndərovla əlaqə saxladıq. İ.İsgəndərov matçın yayımlanmamasının səbəbkarı kimi qarşı tərəfi göstərdi: “Bunun səbəbini “İdman Azərbaycan” kanalından soruşmaq lazımdir. Biz daim oyunlarımızın yayımlanmasına hazırıq. Hər dəfə kanal əməkdaşları bizə müraciət edirlər, sonra da gəlib oyunu çəkirlər. Lakin bu dəfə bizə heç bir müraciət olunmayıb. Oyunu biz internet vasitəsi ilə canlı yayımlayacağıq”.

Təəssüf ki, “Bakı”dan fərqli olaraq “İdman Azərbaycan” kanalından heç kimin oyunun yayımlanmamasıyla bağlı fikrini öyrənə bilmədik.

Əlavə edək ki, “Bakı” - “Xəzər Lənkəran” oyunu 15:00-da start götürəcək ki, həmin vaxt da “İdman Azərbaycan” kanalı “Qəbələ” - AZAL matçını canlı yayımlayacaq. Halbuki Qəbələdəki oyunla müqayisədə, “Bakı” - “Xəzər Lənkəran” matçı daha böyük maraq doğurur. Görünür, “İdman Azərbaycan” kanalı üçün azarkeşlərin deyil, kimlərinsə mənafeyi daha önəmlidir.