“Xəzər Lənkəran”: Mbilla son 4 mövsümün ən yaxşısı oldu

“Xəzər Lənkəran” 2014-cü ildə ilk ev qələbəsini qazanıb. Futbolxeber.az-ın klubun rəsmi saytına istinadən verdiyi məlumata görə, ötən il dekabrın 20-də “Sumqayıt”ı 4:3 hesabı ilə məğlub etdikdən sonra öz meydanında 4 qarşılaşmaya çıxan “Xəzər Lənkəran” həmin görüşlərdə qalib gələ bilməmişdi. Bu il “Neftçi” (2:2) və “İnter”lə (1:1) heç-heçə edən, “Bakı”ya 0:2, “Simurq”a 1:3 hesabı ilə məğlub olan Mustafa Dənizlinin yetirmələri 106 gündən sonra doğma meydanda 3 xal əldə etdi.

4 oyunluq qələbə həsrətinə son qoyan “Xəzər Lənkəran” cari mövsüm imza atdığı klub tarixinin antirekordunu təkrarladıqdan sonra onun yenilənməsinə imkan vermədi. Komanda ötən ilin sentyabr-dekabr aylarında da ardıcıl 4 ev oyununda qalib gəlməmişdi.

Uğursuz seriyaya Azərbaycan Premyer Liqasının XXIX turunun “Qəbələ” ilə oyunundakı 1:0 hesablı qələbə ilə son qoyan “Xəzər Lənkəran” Etame Mbillanın qolu ilə qalib gəldi. Kamerunlu futbolçu bununla da cari mövsüm Premyer Liqada vurduğu qolların sayını 9-a çatdırdı. Etamenin göstəricisi son 4 ildə “Xəzər Lənkəran”ın heyətində ən yüksək məhsuldarlıqdır. Sonuncu dəfə komandada 9 və daha çox qol vuran oyunçusu buna 2009/10 mövsümündə nail olmuşdu.

Bütün yarışları nəzərə almaqla, Mbilla hazırkı mövsümdə 13 qolun müəllifidir.

Mövsüm  Futbolçu                 Qol  Oyun

2004/05   Oqtay Dərəlioğlu   17    21

2004/05   Samir Əliyev          20    31

2006/07   Zaur Ramazanov    20    24

2007/08   Zaur Ramazanov    11    25

2008/09   İvan Tsvetkov        15    21

2009/10   Allan Lalin             9      27

2009/10   Mario Souza           9      28

2013/14   Etame Mbilla         9      25

Qeyd edək ki, Azərbaycan çempionatları tarixinin rekordu Yunis Hüseynova məxsusdur. Yarımmüdafiəçi ilk çempionatın startında ardıcıl 12 qarşılaşmada qol vurmaqla şərəfini qoruduğu “Neftçi”nin qələbələrində pay sahibi olmuşdu.