“Bakı” AZAL-la oyuna hazırdı

Sabah Azərbaycan Premyer Liqasının 27-ci turu çərçivəsində “Bakı” səfərdə AZAL-la qarşılaşacaq. Futbolxeber.az-ın klubun rəsmi saytına istinadən verdiyi məlumata görə, bu gün “zolaqlılar” oyunöncəsi son məşqini keçirib.

Saat 11.10-da yüngül qaçış və isinmə hərəkətləri ilə başlayan hazırlıq ardınca yerini əyləncəli oyuna buraxıb. Belə ki, mərkəz dairənin içinə cəmlənən futbolçular təkqaldı oynayıb. Şən əhval-ruhiyyədə davam edən “kvadrat” tapşırığından sonra “zolaqlılar” maneələri keçməklə, sürətli qaçış tapşırığını yerinə yetirib. Sonda ikitərəfli oyun da baş tutub. Rəmzi olaraq “göylər” və “sarılar”ın mübarizəsində birincilər (3:0) üstün olub.

Qeyd edək ki, icazəli olan Elvin Əliyev və dartılmış əzələsini müalicə etdirən Rauf Əliyev məşqdə iştirak etməyib. Qabırğasında əmələ gələn çatın bitişməsini gözləyən Əfran İsmayılov isə yüngül qaçışla kifayətlənib.