“İnter”i də yenmək əzmindəyik”

“Əvvəlki oyunların ardı olaraq “İnter”lə görüş də ağır olacaq. Xüsusilə, onlarla oyunda rəqabət daha qabarıq hiss olunur”. Futbolxeber.az-ın məlumatına görə, “Bakı”nın baş məşqçisi Milinko Pantiç deyib.

Təcrübəli mütəxəssis sabah Azərbaycan Premyer Liqasının 23-cü turu çərçivəsində “İnter”ə qarşı keçiriləcək oyun haqda danışıb. Pantiç meydana qələbə qazanmaq üçün çıxacaqlarını gizlətməyib:  “İnter” son saniyəyə kimi döyüşən komandadı. Digərlərindən fərqli, rəqibin taktiki sxemi özəlliyi ilə seçilir. Amma bütün bunlar bizim məqsədimizi dəyişmir. Açığı, lap “Barselona” da öncədən qələbə qazanmağa söz vermir. Lakin biz “böyük oyun”un iştirakçılarının ardından “İnter”i də yenmək əzmindəyik. Sadəcə, son dəqiqəyə qədər döyüşəcəyimizə söz verirəm. Kapitan Rauf Əliyevin meydana çıxmayacağı bizi çox narahat edir. Marius Pena da sabah bizimlə olacaq. Ancaq meydana çıxacaq heyəti hələ müəyyənləşdirməmişəm”.