Ukrayna millisinin baş məşqçisi: “Kim deyir ki, Azərbaycanla qarşılaşacağıq?”

Bakıda keçiriləcək 17 yaşadək futbolçular arasında Avropa çempionatında iştirak edəcək Ukrayna yığması artıq paytaxtımızdadır. Ukraynalıların baş məşqçisi Aleksandr Petrakov hava limanında Futbolxeber.az saytının suallarını cavablandırıb.

- Sonuncu dəfə Bakıda olarkən Avropa çempionatında çıxış etmək arzusunda olduğunu qeyd etmişdiniz. Artıq arzunuz həyata keçdi. Təəssüratlarınız necədir?

- Yenidən bura qayıtdıq. Buna görə çox şadam. Avropa çempionatında oynamağı çox istəyirdik. Məqsədimizə də çatdıq.

- Komandanız Bakıya gəlməmişdən öncə Antalyada hazırlıq keçib. Toplanışdan razı qaldınız?

- Hazırlıq prosesimiz çox yaxşı keçdi. Toplanışdan məmnun qaldım. Futbolçular məşqlərdə özlərini yaxşı tərəfdən göstərdilər.

- Antalyada yoxlama oyunu keçirdiniz?

- Bəli, yoxlama oyununda qüvvəmizi sınadıq. “Antalyaspor”un U-19 komandası ilə qarşılaşdıq və 1:0 hesablı qələbə qazandıq.

- Avropa çempionatı öncəsi son yoxlama oyununu Azərbaycana qarşı keçirəcəksiniz.

- Azərbaycanla? Yox, belə bir plan yoxdur. Nə oyun? Bunu kim deyir?

- Yoxlama oyununun keçirilməsi haqda məlumatımız var.

- Məndə bu haqda heç bir informasiya yoxdur.

- Avropa çempionatından nə gözləyirsiz?

- Avropa çempionatı futbol bayramıdır. Hər futbol adamı bu turnirdə iştirak etməyi arzulayır. Mən də həyatımı futbola həsr etmişəm. Komandamla birgə bu bayramın parçası olmaq üçün Bakıya gəlmişik.

- Qrupdakı rəqibləriniz haqda nə deyə bilərsiz?

- Hansısa rəqibi fərqləndirməyəcəyəm. Hesab edirəm ki, qrupda hamının şansı bərabərdir. Ümumiyyətlə, turnirdə çıxış edən 16 komandanın hər birinin üstün cəhətləri var.

- Turnirin favoriti qismində hansı komandanı görürsüz?

- Ad çəkmək istəmirəm. U-17-lərin mübarizəsində aşkar favorit yoxdur. 16 komanda arasında favorit seçmək çətindir.

- U-17-lərin Avropa çempionatı dünya futboluna ulduzları bəxş edən ilk turnir hesab olunur. Bu gün Ukrayna millisində gələcəkdə Runi, Fabreqas, Poqba kimi ulduza çevrilmək potensialı olan futbolçu var?

- Komandamdan hansısa futbolçunu fərqləndirmək istəmirəm. Ukrayna millisi komanda şəklində güclüdür. Qazandığımız uğurlar da bütün komandanın əməyinin bəhrəsidir.

- Ukrayna millisinin turnirdəki məqsədi nədən ibarətdir?

- Məqsədimiz yaxşı oyun sərgiləməkdir. Azarkeşlərimizi sevindirmək istəyirik. Ölkəmizin adını uca tutmaq üçün əlimizdən gələni edəcəyik.

Söhbətləşdi: İBRAHİM

“Layihə AFFA yanında Media Komitəsi tərəfindən maliyyələşdirilir"