De Brüyne "Qarabağ"a qarşı oynamayacaq

“Napoli”nin futbolçusu Kevin De Brüyne zədələnib.

Futbolxeber.az-ın klubun saytına istinadən verdiyi məlumata görə, "İnter"lə görüşdə zədə alan belçikalı yarımmüdafiəçinin əzələsində yüksək dərəcəli yırtıq aşkarlanıb. Bu səbəbdən də o, artıq reabilitasiya proqramına başlayıb.

İtaliya mətbuatı isə futbolçunun bir neçə aylıq sıradan çıxdığını yazıb. Onun 2026-cı ilin əvvəlinə qədər meydana çıxa bilməyəcəyi ehtimal edilir.

A seriyasının son turunda "İnter"lə görüşün 33-cü dəqiqəsində penalti zərbəsindən hesabı açan De Brüyne elə həmin an zədələnib.

Qeyd edək ki, 34 yaşlı futbolçu bu  mövsüm "Napoli"nin heyətində 11 oyun keçirib, 4 qol vurub və 2 məhsuldar ötürmə edib.

Xatırladaq ki, "Napoli" UEFA Çempionlar Liqasının Liqa mərhələsində  "Qarabağ"ın rəqiblərindən biridir. Komandalar arasında oyun noyabrın 26-da Neapolda keçiriləcək. Bu isə o deməkdir ki, De Brüyne Ağdam klubu ilə görüşdə komandasına kömək edə bilməyəcək.