Mahir Emreli heyətə düşməməsindən danışdı

Azərbaycanın milli komandasının hücumçusu Mahir Emreli klubu "Kayzerslautern"də son oyunlara çıxmamasına münasibət bildirib.

Futbolxeber.az saytının məlumatına görə, 28 yaşlı hücumçunun adı 2-ci bundesliqanın 7-cu turunda "Paderborn"la səfər matçında (0:2) da iştirak ərizəsində olmayıb. Beləliklə, o, baş məşqçinin qərarı ilə ardıcıl 4 bundesliqa oyununu buraxmalı olub.

"Paderborn"la oyundan əvvəl Emreli Almaniyanın "Rheinpfalz” qəzetinə açıqlama verib və haqqındakı söhbətlərdən narazılığını ifadə edib. O deyib: “Komanda ard-arda üç qələbə qazandı, amma hamı "Kayzerslautern"nin uğurlarını qeyd etmək əvəzinə mənim barəmdə yazır”.

O əlavə edib ki, baş məşqçi Torsten Liberknextlə heç bir problemi yoxdur: “Mənim məşqçiyə qarşı heç bir narazılığım yoxdur. Aramızda heç vaxt mübahisə və ya neqativ söhbət olmayıb. Mən ona və ümumiyyətlə, bütün məşqçilərə hörmətlə yanaşıram”.

Bununla yanaşı Azərbaycan millisinin üzvü hələ də Liberknextin oyun üslubuna öyrəşməyə çalışdığını bildirib: “Bu mövsüm "Kayzerslautern" başqa taktiki sxemlə, daha çox uzun ötürmələrlə oynayır. Mən buna öyrəşməli oldum və hələ də uyğunlaşmağa çalışıram. Bu, əvvəlki mövqelərimdə alışdığım futbol deyil”.

Xatırladaq ki, M.Emreli bu yay "Kayzerslautern"ə transfer olunub. O, hazırkı mövsümdə cəmi 3 bundesliqa oyununda meydana çıxıb və qol vura bilməyib.