Mourinyo: “Qarabağ”a məğlubiyyətdən sonra evdən çıxmaq istəmirdilər”

UEFA Çempionlar Liqasının Liqa mərhələsinin 2-ci turunda “Benfika” Londonda “Çelsi”yə uduzub (0:1). Bu, Portuqaliya təmsilçisinin cari mövsümkü yarışda ardıcıl ikinci məğlubiiyyəti olub. Lissabon komandası ilk turda evdə “Qarabağ"la matçda da xal itirmişdi (2:3).

Futbolxeber.az saytının “A Bola” nəşrinə istinadən verdiyi məlumata görə, “Benfika”nın baş məşqçisi Joze Mourinyo “Çelsi” ilə matçdan sonra “Sport TV”yə müsahibəsində deyib:

“Açıq danışacağam, necə oynamağından asılı olmayaraq, məğlubiyyət yenə də məğlubiyyətdir. Mən bu həqiqəti oyunçularımdan gizlətmək istəmirəm. Amma uduzmağın da fərqli formaları var. Elə məğlubiyyət var ki, ertəsi gün evdən çıxmağa utanırsan, bir də var ki, oyundan müsbət şeylər götürürsən. Biz güclü komandaya qarşı bərabər səviyyədə oynadıq. Nəticə başqa cür də ola bilərdi. Az vaxtda məşq etməyimizə baxmayaraq, müsbət çox şey oldu. Bu, indiyədək ən yaxşı oyunumuz idi – komanda sabit və təşkilatlanmış idi”.

Jurnalistin “Komanda azarkeşlərin inamını geri qazanırmı?” sualına Mourinyo belə cavab verib: “Biz bunu yalnız yaxşı nəticələrlə edə bilərik. “Qarabağ”la oyundan sonra futbolçular ertəsi gün evdən çıxmaq istəmirdilər. Amma sabah “Avenida da Liberdade”də şam yeməyinə getsələr, heç kim onları təhqir etməyəcək. Məncə, bu, müsbət haldır. Mən nəticə yönümlü insanam, uduzmaq uduzmaqdır, amma dediyim kimi, uduzmağın da müxtəlif formaları var”.