“Sumqayıt”ın hücumçusu ehtiyatda qaldı, komandası DÇ-2026-ya yaxınlaşdı

DÇ-2026-nın Asiya zonasında növbəti oyunları keçirilir.

Futbolxeber.az saytının məlumatına görə, “Sumqayıt”ın hücumçusu Bobur Abdixolikovun dəvət aldığı Özbəkistan millisi 7-ci tur çərçivəsində öz meydanında Qırğızıstanı qəbul edib.

Görüş özbəklərin 1:0 hesablı qələbəsi ilə yekunlaşıb.

“Sumqayıt”ın hücumçusu əvvəldən sona kimi görüşü ehtiyat oyunçular skamyasından izləyib.

Bu qələbə sayəsində Özbəkistan millisi DÇ-2026-ya bir addım da yaxınlaşıb. 7 turdan sonra 16 xalı olan Özbəkistan hazırda qrupda ikincidir. Komanda ən yaxın izləyiciləri – BƏƏ və Qətər millilərini 6 xal qabaqlayır. Qrup mərhələsinin sonuna isə cəmi 3 tur qalıb. Son 3 görüşdə bu üstünlüyü əldən verməyəcəyi halda Özbəkistan millisi tarixində ilk dəfə Dünya çempionatına vəsiqə qazanacaq. Komanda ilk iki yeri tutmayacağı halda isə DÇ-2026-ya vəsiqə uğrunda pley-off matçlarına qatılacaq.