Patrik Andrade: “Zirə”yə qarşı oynamaq asan deyildi”

“Qələbə qazanmaq olduqca çətin oldu. “Zirə” kimi balanslı komandaya qarşı oynamaq asan deyildi”.

Futbolxeber.az saytına açıqlamasında bu sözləri “Qarabağ”ın yarımmüdafiəçisi Patrik Andrade Azərbaycan Premyer Liqasının XVIII turunda “Zirə” üzərində qazandıqları 1:0 hesablı qələbəni şərh edərkən deyib.

Afrikalı futbolçu ili qələbə ilə başa vurduqları üçün sevincini gizlətməyib: “Fərqlənmək üçün çox çalışdıq. Bu nəticə ilə tətilə getdiyimiz üçün komanda olaraq sevinirik. Həm 3 xal qazanmaq, həm də ilk pillədə olmaq çox yaxşıdır”.

P.Andrade istirahət üçün vaxtlarının az olduğunu bildirib: “Öz üzərimizdə həmişə çalışırıq. Tətil müddətində də fərdi məşqlər edəcəyik. Qurban Qurbanov komandanı hazır vəziyyətə gətirmək üçün bacardığını edir. Addım-addım mövsümün ikinci yarısına, eləcə də “Braqa” ilə oyunlara hazırlaşacağıq. Qarşıda bizi sadəcə 5 günlük istirahət gözləyir. Daha sonra yenidən məşqlərə başlayacağıq”.

30 yaşlı futbolçu bir neçə gün əvvəl Xankəndində keçirdikləri tarixi matç barədə də təəssüratlarını bölüşüb: “Matç bizim üçün olduqca yaxşı keçdi. Oradakı təəssüratlarım çox mükəmməldir. Rəqibi də alqışlayıram. Kubokda bizə qarşı çox yaxşı hazırlaşmışdılar. 1 qol vura bilsək də, çox yaxşı matç alındı və növbəti mərhələyə vəsiqə qazandıq. Bu, bizi sevindirir. Amma daha önəmlisi olan Azərbaycan üçün mühüm əhəmiyyət kəsb edən o torpaqlarda meydana çıxmaq idi”.

Azad NURİYEV