Sabiq “Qəbələ”li: “Qazaxıstan millisinin Avro-2024-ə yollanmaq üçün yaxşı şansı var”

“Qəbələ”nin sabiq baş məşqçisi Yuri Syomin Qazaxıstan millisinin Avro-2024-ün seçmə mərhələsindəki çıxışını dəyərləndirib.

Futbolxeber.az saytının məlumatına görə, “Sport-Ekspress”ə açıqlamasında rusiyalı mütəxəssis Qazaxıstan yığmasının qazandığı nəticələrdə baş məşqçi Maqomed Adiyevin böyük pay sahibi olduğunu vurğulayıb:

“Adiyev yaxşı məşqçidir. O, Qazaxıstan millisindəki fəaliyyəti ilə yüksək bacarığını nümayiş etdirir. Adiyevin komandasının Avro-2024-ə yollanmaq üçün yaxşı şansı var. İnanıram ki, qazaxlar fürsəti əldən verməyəcəklər. Bu, Qazaxıstan futbolun üçün böyük nailiyyət olar”.

Qeyd edək ki, dünən öz meydanında Şimali İrlandiyanı 1:0 hesabı ilə məğlub edən Qazaxıstan millisi xallarının sayını 12-yə çatdırıb. H qrupunda 6 turdan sonra Sloveniya millisi 14 xalla liderdi. İkinci pillədə qərarlaşan Danimarka 13 xala sahibdi. Finlandiya və Qazaxıstan milliləri isə 12 xalla 3-4-cü yerləri bölüşdürürlər. Gələn tur Sloveniya Finlandiyanı qəbul edəcək. Qazaxıstan isə Danimarka səfərinə yollanacaq.