“Tottenhem”in baş məşqçisi postuna 5 namizəd

“Tottenhem” Antonio Konteni hələlik istefaya göndərməsə də, onun yerinə əvəzləyici axtarır.

Futbolxeber.az saytının “The Guardian”a istinadən verdiyi məlumata görə, “Tottenhem” rəhbərliyinin əsas hədəfi “Sportinq”in baş məşqçisi Ruben Amorimdir. İndiki məqamda onun gəlişi üçün London klubu 20 milyon avro təzminat ödəməlidir. Lakin Amorim “Tottenhem”lə mövsümün sonunda müqavilə imzalasa, bu halda təzminatın məbləği indiki ilə müqayisədə 5 milyon avro az olacaq.

Bu səbəbdən də mümkündür ki, Kontenin istefasından sonra baş məşqçi səlahiyyətləri mövsümün sonuna kimi köməkçi məşqçi Rayan Meysona tapşırılsın. Hansı ki, 2021-ci ildə Joze Mourinyonun qovulmasından sonra məhz Meyson bir müddət komandaya rəhbərlik edib.  

“Tottenhem”in baş məşqçi postuna digər namizədlər isə Vensan Kompani, Maurisio Poçettino, Tomas Tuhel, Luis Enrike və Roberto De Zerbidi.