Prokuror niderlandlı futbolçunun həbsini istədi

Nidelandlı hücumçu, hazırda Rusiyanın “Ural” klubunda forma geyən Ray Vlutun törətdiyi qəza ilə bağlı aparılan istintaq yekunlaşıb.

Futbolxeber.az saytının Rusiya mətbuatına istinadən verdiyi məlumata görə, 2021-ci ildə vətənində çıxış edərkən 27 yaşlı forvard avtomobili saatda 203 km sürətlə idarə edərkən qəza törədib. Nəticədə onun toqquşduğu avtomobildə olan ailənin azyaşlı üzvü ciddi xəsarət alıb. Qəzadan sonra 4 yaşlı oğlan uşağı yerləşdirildiyi xəstəxanada vəfat edib.  

Prokuror futbolçunun 3,5 illik həbs olunmasını, eləcə də onun 4 il müddətinə sürücülük vəsiqəsindən məhrum olmasını tələb edib.

“Vlut avtomobili saatda 203 km sürətlə idarə edib. O, əyləci basmağa cəhd belə etməyib. Bu cür sürət həddi onun seçimidir. Şübhəli şəxs qəzadan sonra cəzadan yayınmaq üçün hər şeyi edib”, - prokuror belə deyib.

Prokuror “hər şeyi edib” deyərkən futbolçunun yalan ifadə verməsini nəzərdə tutub.