“Gent”in kapitanı “Qarabağ”a qarşı oynamayacaq?

“Gent”in (Belçika) kapitanı futbolçusu Vadis Ocica-Ofoe Konfrans Liqasının pley-off mərhələsində “Qarabağ”la oyunlarda iştirak etməyə bilər. 

Futbolxeber.az saytının məlumatına görə, 34 yaşlı yarımmüdafiəçi ölkə çempionatının 20-ci turunda “Kortreyk”lə matçın (2:1) 16-cı dəqiqəsində zədələnərək meydanı vaxtından əvvəl tərk edib. Nəticədə Vadis dizindən əməliyyat olunub. Belçika millisinin keçmiş üzvünün yaşıl meydanlara nə vaxt qayıdacağı açıqlanmır. Lakin futbolçunun sağalma prosesinin bir neçə ay vaxt aparacağı gözlənilir.

Qeyd edək ki, “Qarabağ” “Gent”lə ilk oyununu fevralın 16-da Bakıda, cavab görüşünü isə 23-də Gentdə keçirəcək.