“Neftçi”nin sabiq futbolçusu karyerasını başa vurdu

Gürcüstan millisinin sabiq üzvü Georgi Navalovski karyerasını başa vurub.

Futbolxeber.az saytının məlumatına görə, gürcü müdafiəçi 36 yaşında peşəkar futbolla vidalaşıb.

Karyerasına Tbilisi “Dinamo”sunda başlayan Navalovski 2 dəfə Azərbaycan klublarında da forma geyib.

2010-cu ildə müqavilə ilə məxsus olduğu “Anji” tərəfindən Bakı “İnter”inə (indiki “Şamaxı” - red.) icarəyə verilən solaxay futbolçu 7 il sonra “Neftçi”yə üz tutub. Navalovski 2017-ci ildə flaqmanın heyətində 13 görüşdə meydana çıxıb.

Azərbaycanla yanaşı, Rusiya, Yunanıstan və Belarusda legioner həyatı yaşayan təcrübəli müdafiəçi karyerasını 2019-cu ildən çıxış etdiyi Batumi “Dinamo”sunda başa vurub.

Qeyd edək ki, Navalovski 2008-ci ildən dəvət aldığı Gürcüstan yığmasında 36 görüşdə forma geyib.