İspaniyada Maurinyonun şərəfinə turnir keçiriləcək

Madridin "Deportivo Kanilyas" klubu "Real"ın sabiq baş məşqçisi Joze Maurinyonun şərəfinə gənclər arasında beynəlxalq turnir təşkil edəcək. Futbolxeber.az-ın məlumatına görə, turnirin oyunları 20-22 sentyabr tarixlərində keçiriləcək. Xatırladaq ki, Maurinyo "Kral klubu"nu çalışdırdığı vaxtlarda onun 14 yaşlı oğlu Joze Mario Faria Feliks Maurinyo məhz bu komandada forma geyirdi. Hazırda kiçik Maurinyo "Fulhem"də çıxış edir ki, portuqaliyalı məşqçinin şərəfinə təşkil olunmuş turnirdə mübarizə aparacaq klublardan biri də məhz London təmsilçisidir. Yarışda həmçinin "Real", "Barselona", "Atletiko", "Yuventus" və "Verder" kimi tanınmış klublar da mübarizə aparacaq.

"Marca"nın yaydığı məlumata görə, İspaniya klubunun belə bit turnir keçirməsi heç də səbəbsiz deyil. Çünki portuqaliyalı mütəxəssis klubun məşqçiləri üçün tez-tez seminarlar təşkil edib, hətta klubun çətin anında forma və digər lazımı əşyaların alınması üçün 8 min avro xərcləyib.