Kakadan "Real"a vida məktubu

"Real"ın rəsmi saytında "Milan"a qayıdan Kakanın vida məktubu yer alıb. Həmin məktubu təqdim edirik: "Madrid "Real"ının azarkeşləri, mən sizinlə 4 il keçirdim. Bu müddət ərzində özümü tam olaraq komandaya həsr etdim. 3 ildə 3 titul qazandıq. Bu böyük klub daim mənim qəlbimdə yer alacaq. İndi karyeramda yeni mərhələ başlayır. Amma mən yenə də İspaniyanı sevməyə davam edəcəyəm. Eləcə də burada keçirdiyim gözəl günləri ömrümün sonuna kimi xatırlayacağam. Əminəm ki, bizim hər birimizin məqsədi komandaya uğur qazandırmaq idi. Çətin anlarımız da oldu. Amma heç vaxt "Real"ın bir hissəsi olduğumu unutmayacağam. İmkandan yararlanaraq, komanda yoldaşlarıma, məşqçilərə, tibbi və inzibatı personala, klub rəsmilərinə, prezident Florentino Peresə və "Real"ın bütün azarkeşlərinə minnətdaram".

Kaka məktubunu "Hala Madrid!" ifadəsi ilə bitirib.