Şeydayev Rusiyada ən yaxşı oyunçuları arasında

Rusiya Premyer Liqasında mart ayının ən yaxşı oyunçusu müəyyənləşib.

Futbolxeber.az saytının məlumatına görə, Premyer Liqanın “VKontakte” sosial şəbəkəsindəki rəsmi səhifəsində aparılan sorğunun nəticəsinə əsasən, “Zenit”in iranlı hücumçusu Sərdar Azmun 49.46 faizlə (20.834 səs) ən yaxşı oyunçu seçilib. Səsvermədə 5 futbolçunun adı yer alıb ki, onların sırasınsa milli komandamızın “Krılya Sovetov”da oynayan hücumçusu Ramil Şeydayev də daxil edilib. Ötən ay “Lokomotiv”, “Yenisey” və “Anji” ilə matçlarda ümumən 3 qol vuran Şeydayev martın TOP-5-liyində sonuncu yeri tutub – 2.37 faiz (999 səs).

Ümumilikdə sorğunun yekun nəticəsi aşağıdakı kimi olub:

1. Sərdar Azmun (“Zenit”) - 49.46 faiz

2. Fyodor Çalov (SSKA) -  35.12 faiz

3. Anton Mirançuk (“Lokomotiv”) - 6.53 faiz

4. Mario Fernandes (SSKA) - 6.52 faiz

5. Ramil Şeydayev (“Krılya Sovetov”) - 2.37 faiz