“Qalatasaray” 21-ci dəfə çempion oldu

Türkiyə Superliqasında 2017/2018 mövsümünün qalibi müəyyənləşib.

Futbolxeber.az saytının məlumatına görə, son turda səfərdə “Göztəpə”nin qonağı olan “Qalatasaray” 1:0 hesablı qələbə qazanıb. Bafetimbi Qomisin penaltidən vurduğu qolla “Cim-Bom” xallarının sayını 75-ə çatdıraraq, 21-ci çempionluğunu rəsmiləşdirib.

Öz meydanında “Konyaspor”a qalib gələn (3:2) “Fənərbaxça” gümüş medallara sahib çıxıb. “Fənər” kimi “Başakşəhər” də mövsümü 72 xalla tamamlasa da, yekunda mövsümü 3-cü pillədə bitirib.

“Sivasspor” üzərində 5:1 hesablı qələbə qazanan “Beşiktaş” isə mövsümü dördüncü pillədə başa vurub.

Qeyd edək ki, “Qalatasaray” və “Fənərbaxça” Türkiyəni Çempionlar Liqasında təmsil edəcək. “Başakşəhər”, “Beşiktaş” və kubokun qalibi “Akhisarspor” isə Avroliqada mübarizə aparacaq.