UEFA “Qalatasaray”ı cəzalandıracaq

Çempionlar Liqasının qrup mərhələsinin dördüncü turu çərçivəsində keçirilən “Borussiya” - “Qalatasaray” oyunu 2 dəfə dayandırılıb. Futbolxeber.az-ın məlumatına görə, ilk belə hal 52-ci dəqiqədə yaşanıb. Türkiyəli azarkeşlər tribunada qarışıqlıq yaratmaqla meydana petarda atıblar. Bu isə futbolçular üçün təhlükəli olduğundan matç dayandırılıb. Felipe Melo, Hamit Altıntop və Fernando Musleranın fanatları sakitləşdirmək cəhdi öz bəhrəsini verib və oyun davam etdirilib. Görüşün sonunda, hesab 4:1 meydan sahiblərinin xeyrinə olarkən yenidən “Qalatasaray”lıların əyləşdiyi tribunadan meydana petarda və oturacaqlar atılıb. Nəticədə qarşılaşma ikinci dəfə dayanıb.

Qeyd edək ki, daha əvvəl Londonda “Arsenal”a qarşı baş tutan matçda da buna bənzər hal yaşanmışdı. O vaxt UEFA “Qalatasaray”ı 50 min avro cərimələmişdi. Budəfəki cəzanın daha sərt olacağı gözlənilir.