"Fənərbaxça"nın futbolçusu "Qalatasaray"ın çempionluğunu qəbul edib

"Fənərbaxça"nın futbolçusu Mussa Sou Avroliqanın finalından kənarda qalmalarına münasibət bildirib. Futbolxeber.az-ın məlumatına görə, afrikalı forvard qol epizodlarını qaçırmalarından şikayətlənib: "Yenilgiyə görə çox üzgünəm. Amsterdamda meydana çıxmağı çox istəyirdik. Qol vurmaq üçün şanslarımız da oldu. Amma təəssüf ki, yaxaladığımız şansları boşa verdik. Hər kəs əlindən gələnin ən yaxşısını etdik, mübarizə apardıq. Təəssüflər olsun ki, alınmadı".

Seneqallı futbolçu Superliqa haqda da danışıb: "Avroliqa dəftəri bizim üçün artıq bağlanıb. İndi diqqətimizi çempionata yönəltməliyik. Düzünə qalsa, bu saatdan sonra "Qalatasaray"a çatmağımız çox çətindi. Bunu etiraf etmək lazımdı. İndi diqqətimizi ölkə kubokuna yönəltməliyik. Hədəfimiz Türkiyə kubokunu qazanmaqdı. Kuboku alıb, azarkeşlərimizi sevindirmək istəyirik. Onlara ən azından 1 kubok hədiyyə etmək istəyirik".