“Barselona”nın qapıçısından rekord göstərici

La Liqanın 7-ci turunda “Barselona” səfərdə “Rayo Valekano”nu 2:0 hesabı ilə məğlub edib. Futbolxeber.az-ın məlumatına görə, İspaniya çempionatında ardıcıl 7-ci oyunda qapısını toxunulmaz saxlayan Klaudio Bravo rekorda imza atıb. O, La Liqa tarixindəki ən uzun müddətli “quru” seriyanın müəllifi olub. Bravonun seriyası 630 dəqiqəyə çatıb.

Qeyd edək ki, əvvəlki rekord da “Barselona”lı qolkiperə məxsus idi. Söhbət 1977/78 mövsümündə 560 dəqiqədə qapısında qol görməyən Pedro Marie Artoledən gedir. Həmin vaxt o, 6 oyunda, eləcə də 7-ci matçın ilk 20 dəqiqəsində qapısını toxunulmaz saxlamağa müvvəffəq olmuşdu. “Rayo Valekano” ilə görüşdə ilk 21 dəqiqədə qol buraxmayan Bravo isə göstəricisini 561 dəqiqəyə çatdırmaqla yeni rekordun müəllifi olub.

Əlavə edək ki, qarşıdakı matçlarda Bravonun bu rekordu daha da yaxşılaşdırmaq imkanı var.