Simone: “Nədənsə məni daha çox “Real” və “Barselona” ilə oyunlarda cəzalandırırlar”

“İnsan nə vaxtsa səhvə yol verirsə, mütləq bunun cəzasını çəkməlidir. Odur ki, mən də öz cəzamı gözləyirəm. Bu insident artıq keçmişdə qalıb. İndi bu barədə yenidən danışmağa ehtiyac görmürəm”. Futbolxeber.az-ın məlumatına görə, bu sözləri “Atletiko”nun baş məşqçisi Dieqo Simone deyib.

“Real”a qarşı baş tutan Superkubok oyununda tribunaya göndərilən argentinalı mütəxəssis, əsasən “Kral klubu” və “Barselona” ilə oyunlarda meydandan uzaqlaşdırılmasının qəribə olduğunu bildirib: “Ümid edirəm ki, mənə verilən cəzadan “Atletiko”ya ziyan gəlməyəcək. Ötən mövsüm 5 dəfə belə cəzaya məruz qaldım. 2 dəfə “Real”, 2 dəfə “Barselona”, 1 dəfə də “Malaqa” ilə oyunda. Bundan başqa, Çempionlar Liqasının finalında da meydandan uzaqlaşdırıldım. Bir qədər qəribə görünə bilər. Nədənsə məni daha çox “Real” və “Barselona” ilə oyunlarda cəzalandırırlar”.