Maurinyo: “Düzünü demək lazımdır, İtaliya əla qələbə qazandı”

“Çelsi”nin baş məşqçisi Joze Maurinyo DÇ-2014 çərçivəsində keçirilən İngiltərə - İtaliya (1:2) oyunu haqda danışıb. Futbolxeber.az-ın məlumatına görə, portuqaliyalı mütəxəssis bu matçı geridə qalan müddət ərzində mundialın ən yaxşı görüşü hesab etdiyini bildirib: “Hələ ki İngiltərə və İtaliya millilərinin oyunu mundialdakı ən yaxşı matçdır. Əsl gərgin oyun izlədik. Düzünü demək lazımdır, İtaliya əla qələbə qazandı. Amma onu da deyim ki, həmin gün meydanda son illərin ən yaxşı İngiltərəsini gördüm. Komandalar taktiki cəhətdən gözəl mübarizə apardılar. Taktiki cəhətdən İtaliya millisi daha üstün idi. Lakin İngiltərənin oyun fəlsəfəsi də çox xoşuma gəldi. Kimlərsə düşünə bilər ki, oyunun ədalətli nəticəsi 2:2 idi. Amma Prandelli 2:1-dən sonra əla iş gördü. O, Mottanı meydana buraxdı. Bu futbolçu Pirlo və De Rossi ilə birgə mərkəzdəki boşluqları bağladı. İtaliya əla çıxış etdi. Komandanı çox bəyəndim”.