Nigeriya millisinin baş məşqçisi: “Şotlandiya ilə oyun danışılmış deyildi”

Nigeriya millisinin baş məşqçisi Stiven Keşi Şotlandiyaya qarşı keçirdikləri yoxlama matçının (2:2) nəticəsinin əvvəldən razılaşdırılmış olması barədə yayılan xəbərlərə münasibət bildirib. Futbolxeber.az-ın məlumatına görə, 52 yaşlı mütəxəssis ittihamları qəbul etməyib: “Biz bu barədə komanda üzvləriylə danışdıq. Yayılan söz-söhbət gülməlidir. Heç kim söhbətin haradan başladığını bilmir. Biz futbol oynayırıq, mərc oyunları ilə məşğul olmuruq. Nə futbolçu, nə məşqçi kimi danışılmış oyunlarda heç vaxt iştirak etməmişəm”.  

Qeyd edək ki, Britaniyanın “The Telegraph” nəşri qarşılaşmadan öncə matçın danışılmış olduğu barədə xəbər yaymışdı. Matçın gedişində Nigeriya millisinin qapıçısının topu öz qapısına göndərməsi böyük ajiotaj doğurub. Lakin Ostine Edjidenin öz qapısına vurduğu qol hesaba alınmayıb. Belə ki, hakim həmin epizodda qayda pozuntusu qərarı qəbul edib.